قصيدة الشاعر / عادل صالح سعد شرهان (أبو قصي)

سرى ليلي على وصف القمر والنفس مربوشه

20 يونيو 2019م بدع موجهة الى الشاعر صالح محمد أبو رفاد القايفي.

....................

سرى ليلي على وصف القمر والنفس مربوشه

خيالي في الهواء قد بات من حسن القمر مربوش

كتبت الشعر بالعنوان عاد النفس معطوشه

وما غير الظبى تروي فؤاد الضامي المعطوش

حلمت الزين بالفستان الابيض داخل الكوشه

مسك يدي وحن الصوت في جو السماء راجوش

وصوت المحجرات اقبل وحولي شكلوا حوشه

وهذا ذي يصورني وهذا يقبع الطربوش

وخارج مرسديس ازرق بلوحه صفر مخدوشه

اخذني والقمر فندق عليه اشجار وسط الحوش

وفي السابع من ادواره بشقه خاص مفروشه

سكن مخصوص والخدمه تجي لا عندنا بلوش

مع الهاجس ومزيونه على الكفين منقوشه

عليها بهجه الفرحه تلاعب جعدها المندوش

قمر في طلعها الساحر بعطر الورد مرشوشه

بوصفه مثل عذب الماء زلال الصافي الدردوش

انا يا ابوي ما احلا العين والخدين وارموشه

وما احلا الفم والوجه البياضي صافي النمشوش

اثارت كامل احساسي ونفسي فيه مدهوشه

بسحر اطرافها الحلوه خيالي منها مدهوش

تقلي يا حبيب القلب روحي فيك موحوشه

وحشني ناظر اعيونك وشوفك يا الغلاء موحوش

سهرنا في غرام الليل لا صجه ولا دوشه

علينا الورد يتناثر وفله تحتنا مفروش

وصوت الدان يطربنا بعزف انغام فرفوشه

ونسمع من غناء فيروز والدبكات من علوش

رقيقه في سوالفها وفيها الروح منعوشه

بهمس الصوت تتكلم وذوق الخاطر المنعوش

مثيل البرعم البيضاء خفيفه دم فركوشه

ادب واخلاق يا ذا البنت يرحم والدين ربوش

مع اول باص يا مرسول وعاد الفجر غبشوشه

لبو نعمان شل الخط هذا هوش يا بي هوش

شغلنا كل يوم يشعر ويتغزل بعشعوشه

على الفيسبوك يتقول وينظم بالغزل راجوش

اذا قلبه مهنهن يقدم الميدان ويروشه

اولا القايفي في واقعه يا ناس ما هلوش

ومني حسب ما اجبرني كتبت اقوال مفتوشه

وقد كنا سكهنا من ربيش اللعب بالمفتوش

انا مالي صله اتغزل بضل اوضاع مغشوشه

وطنا ضاع بالعدوان شماله والجنوب مغشوش

رجال الله في الجبهات تهد الحيد وتهوشه

دعيت الله ينصرهم على سلمان والا بوش

وذا الدنبوع عند ارجيل نوره يجحف القوشه

بلانا الله فيه بلوى جعله طعن في النخشوش

............

قصيدة الشاعر / صالح محمد القايفي (أبو رفاد)

جواب على قصيدة الشاعر عادل صالح سعد شرهان.

................

سريت الليل انا والهاجسي نعمل لنا موشه

على درب الهوا مادام نفسي هاويه با اموش

مٌع الُقًلُبّ الُهوَاوَيَ لُا تْزُالُ الُنَفَسِ مٌرَهوَشِه

غرام الحب ما غيره يداوي قلبي المرهوش

الا يا ليت من خزن بربطه قات مقموشه

حروفي والقوافي عاشقات النزي المقموش

لوصف الزين يلزمني حروف ابيات مقلوشه

تطابق في معانيها صفات الحالي المقلوش

يقول القايفي صادفت مزيونه وزركوشه

ولاحظت الاناقه من حلا فستانها الزركوش

غزاله في مزاياها عباد الله مبلوشه

امٌيَرَه مٌنَ رَأُها ذَابّ وَانَا مٌنَها مٌبّلُوَشِ

قلوب اهل الهوى من حسنها والذوق مفقوشه

وقلبي ذاب فيها والمشاعر والكبد مفقوش

شبيه البدر من حوله نجوم الليل موهوشه

بدت مثل القمر نور الكواكب خلفها موهوش

رمت قلبي بنظره خاطفه من عين فرخوشه

اصابتني اصابه من سهام الرامش الفرخوش

وَخطت لُيَ رَسِالُه نلتقيَ لُادِاخل الُعوَشِه

تلاقينا تبادلنا هوانا عوش الا ياعوش

تقابلنا تعانقنا عناق ارواح مرعوشه

كما حسيت رعشت جسمها في قلبي المرعوش

انيقه ناعمه تشبيه حبه خوخ مقروشه

تندي بالعرق والعطر ينفح منها موروش

ومصيت العسل من ثغر دله شهد محنوشه

وذاب الروح من طعم الشراب الرايق المحنوش

قضينا يوم كامل فوق جاله قطن منفوشه

الُا يَالُيَتْ وَالُسِاْعُه سِنَه يَا وَرَدِ يَا مٌنَفَوَشِ

توادعنا ودمعتها على الخدين مجهوشه

وحسيت الحراره في دموع اعياني المجهوش

غرامي واقعي ما هو غرام احلام فاشوشه

كمن يحلم وهو نايم ويصبح والخبر فاشوش

أبو نعمان صاغ الرد من عذبه ودردوشه

يصل مخصوص يلقى أبو قصي الشاعر الطاهوش

مقاول ما يهم الا مساميره وشاكوشه

ويتخيل بنات الحور واصبح طارز الشاكوش

اذا قلبه مهنهن شلو اسنانه ونخشوشه

يراهني وذي يرجع يهودي من بني شالوش

ولكن في البدايه يدفن البروه وطالوشه

ويخزن عدته والمصدره واللي والخرطوش

جميع الشعب ذي يتزوجوا باوضاع محروشه

معاذر واهيه والمعذره خوفك من القاشوش

ميادين الوغى فيها سلاح الشعب وجيوشه

رجال الله في الجبهات يتحدوا دول وجيوش

ومن خان الوطن فصل براقيعه وقرقوشه

هرب لا المملكه لابس عبايه عاصب القرقوش

..............

زودنا بالقصيدتين الشاعر أبو رفاد القايفي