قصيدة الشاعر / صالح محمد العومري

بسم الله الرحمن با نبدع بقولي واذكره

موجهة الى الشاعر منير الصلاحي

.................

بسم الله الرحمن با نبدع بقولي واذكره

قادر على الاشياء ولا غيره على الاشياء قدير

يالله انا سالك تيسرها بدنيا وآخره

ومن عذاب القبر يالله جيرنا وانت المجير

ذكر النبي في كل ساعه والصلاه متكرره

على محمد سيّد الخلق المُبشّر والنذير

في كل حال الحمد له واتحمّده واتشكره

ملان أرضه والسماء يستأهل الحمد الكثير

بعد الصلاه يا هاجسي هات القلم والمسخره

واكتب رساله عابره يا مرسلي حان المسير

للعاصمه صنعاء تصل حيث القصور الفاخره

واسأل على شاعر من ابناء الحدا واسمه منير

ابن الصلاحي بلّغه مني تحيه عاطره

توازن الحثره وتملا الكوز والسد الكبير

يا ابن الكميم اسمع سؤالي وادرسه واستفسره

ولي أمل انك على حلّه وتفسيره جدير

رأيت رؤيا في منامي يا صلاحي عبّره

بأن اليمن كوره وجاء جاهل زقلها وسط بير

ورأيت مسلم يخرب الجامع وكافر يعمره

ورأيت سـحبه داخله صنعاء قفا ماطر غزير

واثـنين نصاري في نقُم بيصوروا بالكيمره

رأيت هذا وافتني في ما رأيته يا (مُنير)

وافتيك من عذرا اسيره واختها مستيسره

عاشين طول العمر وسط البحر واخوهن اسير

والام في حيره وابوهن منتظر من يأمره

وبنته الصُغرى اغتصبها مكرمي كادح فقير

والمغتصب مغصوب من صهيون بالأمر اجبره

لا هو عشق فيها ولا هي حبّت العبد الحقير

هذا وبا ارجوا يا (منير احمد) قبول المعذره

في الرأي والرؤيا حقيقه وانت تفهم ما اشير

يا شعب جمهرته كما لاحول لك في الجمهره

قد الحكومه مملكة كسرى وقائدها مشير

كانت يمنّا في العصور الماضيه متحرره

واليوم قلنا اتقدمت بالعكس رجعت للأخير

والله صدق قول المثل قالوا تحاكي يا ذره

الثور يدّوا له علف والبغل يدّوا له شعير

مادام قد في البرلمان العضو والنائب مره

والشعب عاطل في الوطن والبنت في الخارج سفير

هيفاء بفضل المؤتمر في الدائره متميدره

والوف عضو البرلمان والسوسوه نائب وزير

با ادلي برأيي طالما آرائنا متحرره

وانته برأيك يامنير ادله وبالرأي استشير

عنتر ترحّل يا منير احمد وباقي عنتره

قد غيّروا بعد البشيري يامنير احمد بشير

عشرين فوق اربع وخمسين واليمن مستعمره

يحيى مضى واحمد عقب سالم سليمان القصير

ما فادنا ايلول واكتوبر ولا سبتمبره

ولا نفعنا اثنين وعشرين مايو العيد الكبير

اين المصالح ياصلاحي والثمار المثمره

والغاز والبترول والانتاج من عشرين بير

اين عائدات النفط والاسماك ذي مستثمره

قلي من المسئول فيهن بالصراحه يا خبير

من علّم الخنزيز يقرأ يا منير الخنزره

وضعوا جناح الصقر بأذنابه وقالوا له يطير

قُمنا مع العرسان والقونا زقمنا المبخره

ركبوا جواد الخيل واحنا ركّبونا عالحمير

ذلحين با ادخل في حوار اثنين اشقاء مُقمره

الاخ واخته هو سكن صنعاء وهي حلّت عسير

سمير يدرس علم واخته دارسه للدكتره

اهم شي تنجح سميره طز لو يرسب سمير

سمير متواضع وسموره قدي متكبره

طلعت بصاروخ الفضاء والقت جملها والبعير

راحت سميره شغّلت جوّالها بالبيجره

وامست تغازلهم على الهاتف وهي فوق السرير

والتاجر الغربي يغازلها وهي في متجره

لا خالها نكّر ولا ابوها حسب هذا نكير

فضحت عشيرتها وعشقت خصم ابوها المدبره

ورفعت البرقوع فتنه لجل عاشقها يغير

وبنت خالتها صباح الخير ذي متأيمره

عشقت وهي متزوجه رجُل غني ملياردير

حبّت غريب الدار ذي خرّب سكنها وادمره

وسابت ابن العم ذي من لحمها وابن الجوير

صباح عشقت عشق فاضح لعن ابوها ايمره

واليوم عاشق للأميره عسكري فوق الأمير

بنت العرب تعشق لغربي للعرب متنكّره

والعيب يا بنت الجزيره تعشقي غربي نكير

قد ارض ابوها عند ذي قد عشقته مستأجره

ضاعت وضاع الحل ما بين المؤجّر والأجير

الاب تايه في اوروبا وامها في انقره

بالفاكس تطلب بنك با خشوين ولا با كثير

والولد بالدولار يلعب في قمار السمسره

والبنت ضاعت حريتها الكامله فوق الغدير

قال المثل للبنت أمّا الزوج ولا المقبره

هذا اذا عاد شي كرامه في العرب ولا ضمير

مسك الختام ازكي صلاتي ما سكبها ماطره

على محمد سيّد الخلق المبشّر والنذير

...............

زودنا بالقصيدة الشاعر عبد الاله الدغري