يا صاحب القُدره ومن يدّه علينا قادره
تحكي معاناة الشاعر عندما قام بإسعاف والدته الى مجمع مستشفى ذمار وشرح ماحصل له وما عانا من اهمال في المستشفى....
..............
يا صاحب القُدره ومن يدّه علينا قادره
اتعبت نفسي بحث في كشف المبادئ والضمير
شُفت المبادي منتهيه والضمائر خاسره
مات الضمير الحي والمبدا اهمله كمن حقير
والنخوه الانسانيه في مُجتمعنا فاتره
من نشتكي ياللأسف اين الوزاره والوزير
الظلم جاير ياحكومه والحكومه جايره
بالله من المسؤول يهل المؤتمر ضاع البعير
من با يحل المشكله في الحاله المتوتره
بين المواطن والموظف والاداره والمدير
والله صدق قول المثل حجر وسيري سايره
اين انت وينك وين من جوف الحقيقه يامشير
دولة ذمار المستقله شبه ذي مستعمره
مستخدمين فيها نظام المافيا الحزب الشهير
يا مؤتمر شوفوا لنا غيره لواء نستأجره
قد نار صنعاء خير من جنه ذمار الزمهرير
الشعب عانا جُرعتين ما في ذمار العاشره
العن لواء وارحم لواء هذا اللواء الاسم الشهير
مدمن على زنّار سالم ما ابتعد من صابره
حاسب اسف ياللأسف يامجتمع مالك مصير
خاب الامل ياشعب هاذك ماضيك من حاضره
اهم نقطه طارئه في البدايه والاخير
وكادر المسؤليه من أوله لا آخره
اهم نقطه قد شرح في حكمها الاخ السفير
في الجانب الصحي جرائم تُكتـتب في الذاكره
فساد في الصرح الاهم واهمال واضح ياخبير
وسرق زايد نصب واستغلال وايدي ماكره
تسعف مريضك للمجمع للأطباء تستشير
ولا يشوفه لك طبيب الا وحقه حاضره
في ذمة الدكتور بيموت المريض فوق السرير
وحضرة الدكتور لا مابش زلط ما يذكره
إن شي معك بزنيز فذّت وانورت قم جه وسير
وان كان ماشي بـيزنايز فاسعفه للمقبره
حتى رشادات الدواء يعطيك بالكم الكثير
يعطي المريض ابره وله ثنتين لعين الخاصره
قد لي ثلاثين يوم ادوّر في المجمع واستشير
في الباطنيه والجراحه ماطبيب ذي تشكره
من يوم عيد الفطر حتى شرّف العيد الكبير
والحاله الاسعافيه في الباطنيه عاثره
يفعل لك الدكتور عشرين وعد في اليوم القصير
ويخلف الموعد ويلحق بعد وعده معذره
ووعد يتبع وعد يالله جيرنا وانت المجير
حرام يا ارباب البشر عاد به قفى الدنيا آخره
ما عندكم رحمه بحال الكهل والطفل الصغير
ازهقتوا ارواح البشر يهل القلوب الفاجره
يامكتب الصحه امانه بلّغ الاخ الوزير
يأمر بأغلاق المجمع او يغيّر كادره
من الممرض للمساعد للطبيب احسب حمير
..................
زودنا بهذه القصيدة النادرة الاخ الكريم محمد حسين صالح صوال
0 تعليقات